لو كنت مفكر ان انك عشان تعمل شركة يبقى انت محتاج ملايين ومباني ومصانع او محتاج تبقى مليونير عشان تعمل شركة تبقي غلطان.
ابطال قصتنا النهارده برأس مال ٥٠ الف جنيه فقط أسسوا براند مصري عالمي بيتباع في كل مكان في الوطن العربي دلوقتي
بطل قصتنا النهارده هو مش شخص واحد
بطل قصتنا هو فريق عمل شركة ناس تريندز
احمد رضا و ٤ من أصدقائه وهما في الجامعة الامريكية في السنة التالتة
الفكرة
لما لقوا عندهم وقت فاضي كتير قرروا يعملوا حاجة مختلفة
لما شافوا شباب كتير لابس تيشرتات كلها عبارات انجليزية واحيان كتير بتبقا شتايم وفي الغالب مش بيكون عارف ايه المكتوب.
ومن هنا جاتلهم فكرة انك تلبس حاجة تعبر عنك بكلمات مفهومة بتصميم جميل وعلشان كده سموها ناس لانها بتعبر عن الناس.
البداية
وفي ٢٠٠٩ اسسوا الشركة براس مال ٥٠ الف ج من كل واحد ١٠ الاف جنيه
جابوا ١٠ تصميمات كانوا مع صديقهم انس طلبه ودوهم المطبعة وعملو منهم ١٠٠٠ تيشرت
وفي ٢٠١٠ كان اول منتج ليهم معروض فوق سطوح أحد الشركاء وعزموا اصحابهم .
المجموعة الصيفية عملت نجاح كبير وباعوها كلها لأصحابهم في الجامعة
ولما عملوا مجموعة شتوي ما كانش ليها رواج اد كده
وفي ٢٠١١ كانت نقطة تحول في حياة الشركة بالتزامن مع الثورة نزلوا مجموعة تيشرتات في حب مصر وعملوا منها مبيعات كتير جدا
بعد كده كانوا بياجروا ركن في المولات عشان يعرضوا فيه شغلهم
يعني وانت في البداية مش محتاج يبقى ليك فرع يكلفك مبالغ كتير ممكن تبداء علي اي حال
التمويل
وفي نفس السنة جالهم أول تمويل ١٫٣٠٠ مليون الف من شركة تمكين كابتل مقابل حصة من قيمة الشركة أقل من ٥٠٪
وفي ٢٠١٣ قدرت شركة ناس انها توصل لنقطة التعادل وبدأوا في جني الأرباح
بعد كده الشركة معدل النمو بتاعها كان ١٠٠٪ كل سنة عن السنة اللي قبلها
وفي ٢٠١٦ كان أول توسع للشركة خارج مصر في جدة بالمملكة العربية السعودية
واحدة من الأفكار التسويقية الجميلة اللي عملوها الشباب في ناس تريند انهم راحوا للناس اللي الشباب بتحبهم وعرضوا عليهم يلبسوا منتجاتهم زي زاب ثروت وحمزة نمرة
ناس تريندز حتى الآن مالهمش مصنع بتاعهم
بيعملوا منتجاتهم في أكثر من ١٢ مصنع مختلف
هما شايفين انه اهم حاجة التركيز على المنتجات وعددها
طالما انك تقدر تصنع بدون ما تكلف نفسك ملايين
بـ يعلق أحمد رضا وبيقول
رائد الأعمال هو شخص ساب وظيفة من ٩ص الي ٥ م عشان يشتغل ٢٤ ساعة
احنا في ناس بدأنا ب ٥٠ الف جنيه النهارده دي مبيعات يوم واحد
الدروس المستفادة من قصة نجاح ناس:
البساطة انت مش محتاج ملايين عشان تنجح شركة اد ما انت محتاج فكرة مميزة وقابلة للنجاح
متقلدش حد حاول يكون ليك فكرتك ودافع عنها وطورها
انت مش محتاج يبقى عندك مصانع وستورز كتير عشان تطلع منتج وتبيعه، ممكن تصنع عند الغير وتبيع اونلاين موقع علي النت مش هيكلفك ٢٠٠٠ج
الشريك اللي قلبه حامي متفرطش فيه
بس كده يا بطل دي كانت قصتنا النهارده
نتمنى تكون القصة حفزتك انك تبدأ
وأن شاء الله نحكي قصة نجاحك قريب
تقدر تسمعها علي ابل بودكاست apple.co/2M571BU وكمان تقدر تسمعها علي جوجل بودكاست bit.ly/3chP51q
0 التعليقات: