حي الشيخ جراح | جريمة مكتملة الاركان

في عام ١٨٨٠ وصل الى القدس اليهودي يوسف بن راحمين 

اللي كان هارب من المجازر والجرائم والاضطهاد اللي كان بيحصل ضد اليهود في أوروبا

وقال ان مفيش مكان آمن يروح له زي فلسطين لان الناس هناك تعرف ربنا ومش هيغدروا بيه 

ولما وصل للقدس نزل في ضيافة رجل مقدسي اسمه عبدربه خليل بن ابراهيم

ومن المعروف عند العرب إكرام الضيف مهما كان

الرجل الفلسطيني عبدربه ساعد اليهودي يعيش بأمان 

واستأجر له قطعة ارض عشان يزرعها ويعيش منها

ودار الزمن واترد المعروف …. بالغدر

والناس اللي كانو هاربين النهارده أصبحوا محتلين

وبيمارسوا المجازر والتهجير على اصحاب الارض

والغريب في الأمر أن اليهودي اللي سمعنا قصته تم استقباله في حي الشيخ جراح

والنهارده الضيف حتى مش قابل يكون مستضيف

النهارده الضيف بيمارس بلطجته على أصحاب البيت في حي الشيخ جراح

حي الشيخ جراح هو حي مقدسي فلسطيني 

اتسمى على اسم الأمير حسام الدين الجراح وهو أحد أمراء صلاح الدين الأيوبي وكان طبيبه الخاص

توفي عام ١٢٠٢ ودفن في زاوية في نفس الحي

وعشان كده سموا الحي باسمه  و مازال مسجده موجود لحد النهارده

في ١٩٥٦ لجاء ٢٨ عائلة فلسطينية الى حي الشيخ جراح

بعد طردهم من بيوتهم وتشريدهم واحتلالها من قبل المحتل الصهيوني في عام ٤٨ بموجب اتفاق بين السلطات الاردنية بصفتها المسؤولة عن القدس في ذلك الوقت

اتفقت السلطات الاردنية ووكالة غوث للاجئين ودولة الاحتلال على اقامة العائلات الفلسطينية في حي الشيخ جراح

قامت وزارة التعمير والإنشاء الاردنية على بناء منازل لهم مقابل مبلغ رمزي مقابل البناء وحصلوا على عقود تمليكهم للبيوت من الحكومة الاردنية

وفي ١٩٦٧ عقب النكسة اقتحم جيش الاحتلال الضفة الغربية وسيطر على مدينة القدس بالكامل.

وفي ١٩٧٢ قالت لجنة يهودية ولجنة من الكنيست ان اليهود لهم حق في ملكية ارض حي الشيخ جراح

وقدموا وثائق مضروبة بتقول ان اجدادهم اشتروا الارض دي ف ١٨٨٥

ودي الفترة اللي عاش فيها يوسف رحامين في القدس في التوقيت ده كان القانون الفلسطيني بيمنع بيع الارضي لليهود ايجار فقط وده اللي بيثبت كذبهم.

وطالبوا من محكمة الكيان إخلاء الفلسطينيين من الحي وتسليمها لهم

واستمر الصراع داخل محاكم الكيان الصهيوني سنين طويلة

وفي ١٩٩١ محامي العائلات الفلسطينية اليهودي كوهين 

خدع موكلينه وخلهم يوقعوا علي وثائق انه موافقين علي دفع ايجار رمزي للكيان الصهيوني

وفي ١٩٩٧ نجح احد سكان حي الشيخ جراح في الحصول علي وثائق عثمانية بتثيت ملكيته للارض

ولما قدم الوثائق لمحكمة الكيان  تر رفض الدعوى في ٢٠٠٥ والاستئناف في ٢٠٠٦

ومع استمرار الصراع في المحاكم بين العائلات الفلسطينية وجمعيات الكيان الصهيوني

في ٢٠٠٨ قررت سلطات الكيان انها مش هتستنى قرارات المحاكم وقامت بطرد ٣ عائلات من منازلهم في ٢٠٠٨ وفي ٢٠٠٩

العائلات الفلسطينة استمرت في رفع القاضيا 

وكان المفروض محكمة مختلفة هتصدر حكم في ١٦ مايو الحالي

ولكن الجماعات اليهودية المتطرفة ما استنوش وقاموا بطرد العائلات الفلسطينية من بيوتهم امام مرئ ومسمع من العالم 

العالم اللي سكت علي النكبة الاولى في ٤٨ مازال ساكت قمع وطرد وجرائم التطهير العرقي ضد الاحفاد.

الامم المتحدة وحقوق الانسان اللي بتتحرك بس في القضايا الجنسية والخزعبلية

ولما بيكون الاعتداء علي الفلسطينيين فبيكونوا ودن من طين وودن من عجين

سكان حي الشيخ جراح دشنوا هشتاج انقزو حي الشيخ جراح

وده اللي ساهم بشكل كبير وخلى ملايين الناس حول العالم انهم يتكلموا عن الجريمة اللي بتحصل وعن الظلم اللي بيتعرض له اخوتنا الفلسطنيين

وده اللي خلى رئيس وزراء الكيان الصهيوني يقول علي تويتر ان الرأي العام في الشارع العربي هو أكبر عقبة بتواجههم

عايز اقولك ان حروفك اللي بتكتبها من تليفونك دعم للاخوتنا في فلسطين شوكة في حلق الكيان الصهيوني

في نهاية الفيديو ده خلينى اقولك ان دعمك للقضية الفلسطينية 

هو دعم في الأساس لانسانيتك وعقيدتك كمسلم وكمسيحي

فرنسا احتلت الجزائر ١٣٠ سنة وارسلت اكثر من مليون مستوطن فرنسي 

حتى ظن الجميع ان الجزائر بقت ملك لفرنسا 

وعندما ثار الشعب الجزائري كلهم هربوا علي بلادهم .

خليني اقولك ان مع الاحداث الماضية الشعب الفلسطيني بيعيش حالة توحد واتفاق لم يعيشها من ١٩٤٨ 

السيل يبداء بقطرة ربما تكون دي شعلة لانتفاضة الشعب الفلسطيني 

وان شاء الله عن قريب نحتفل بتحرير المسجد الاقصى وفلسطين

ومن هنا اسجل دعمي للاحرار في حي الشيخ جراح وابطال المقاومة في غزة وفي كل شبر من ارض فلسطين المحتلة من قصيدة احمد فؤاد نجم 

يا فلسطينية والبندقاني رماكم              والصهيونية تقتل حمامكو فِ حماكو
يا فلسطينية وانا بدّي آسافر حداكو         ناري في ايديّه وايديه تنزل معاكو
                    على رأس الحية وتموت شريعة هولاكو…
يا فلسطينية والغربة طالت كفاية            والصحراء أنِتْ مِ اللاجئين والضحايا
والأرضِ حَنتْ للفلاحين والسقاية            والثورة غايةْ والنصر أوَّل خطاكو
يا فلسطينية والثورة هي الأكيدة            بالبندقية نفرض حياتنا الجديدة
والسكة مهما طالت وباتت بعيدة            مدّْ الخطاوي هو اللي يسعف معاكو
يا فلسطينية فيتنام عليكو البشارة     بالنصرة طالعة من تحت ميت ألف غارة
والشمعة والعة والامريكان بالخسارة   راجعين حياري عقبال ما يحصل حداكو
يا فلسطينية والبندقاني   رماكم            والصهيونية تقتل حمامكم في حماكو

                                              .............................

تقدر تسمع محتوى المقالى علي البودكاست ده 

بودكاست

وتقدر تسمع الفديو من اليوتيوب من هنا

قطعتين بيتزا بـ 600 مليون $ - جنون البيتكوين

اهلا بيكم

كل سنة وحضرتكم طيبين ورمضان كريم

وان شاء الله تنعاد عليكم الايام وحضرتكم بخير 

   

في 2010 نشر المبرمج الامريكي  لازول هانييتش اعلان على الانترنت بيطلب فيه قطعتين بيتزا 

ممكن حد يجيبلي قطعتين بيتزا وياخد قصادهم ١٠ آلاف بيتكوين 

اصل انا حاسس اني جعان ومكسل اعمل اكل

فضل الاعلان اكتر من ٢٤ ساعة لحد ما رد عليه شخص بريطاني وقبل الصفقة

واللي كان سعرها في الوقت ده 0,003 مقابل الدولار 

يعني الـ 10 الاف بيتكوين بيساوي 30 دولار 

جدير بالذكر أن سعر البيتكوين النهارده 60 ألف دولار للبيتكوين الواحد

يعني صاحبنا هانييتش اشترى قطعتين البيتزا بـ 600 مليون دولار بسعر اليوم

ياترى ايه حكاية البيتكوين دي

وازاي البيتكوين قلب حياة أشخاص رأس على عقب

بسبب قرارتهم الجريئة 

ده اللي هنعرفه مع بعض في موضوع النهارده

بسرعة بقى كوباية الشاي بتاعتك وركز معايا

بسم الله والصلاة والسلام على رسول الله

البيتكوين هي اول عملة رقمية مشفرة لا مركزية

لا مركزية يعني مش بتخضع لبنك ولا في بنك يتحكم في أصدرها

تم اختراعها في ٢٠٠٨ على يد مجموعة من الأشخاص غير معروفة باسم ساتوشي ناكاموتو

بدأ استخدام العملة في عام 2009 عندما تم إصدار تطبيقها كبرنامج مفتوح المصدر

يمكن ارسالها من شخص الي اخر عبر شبكة بيتكوين دون وسيط او طرف تالت زي البنك

يتم التحقق من حوالات الشبكة باسخدام التشفير ويتم تسجيلها في دفتر حسابات موزع يسمى سلسلة الكتل blockchain.

لم يستطع احد اختراق سلسلة كتل البيتكوين ومعظم الاختراقات اللي حصلت هي بسبب اخطاء بشرية في ادارة المحفظة وليست عسوب في النظام.

ويعد سبب الاقبال عليها هي لامركزيتها اي انها لا تخضع لرقابة احد

ويعد ايضا سبب انتقادها لاستخدامها في اعمال غير قانونية

في ٢٠١١ وصل سعر البيتكوين لو احد دولار

وبعدها الشقلبظات بدات تشتغل فيها وده اللي كان سبب في تغيير حياة ناس كتير بسبب قراراتهم

في ٢٠١٣ ارسل الشاب اولاف كارسن وي ايميل لشركة كوين باس 

وهي شركة تعمل في تبادل العملات الرقمية زي البيتكوين والايثروم 

وكان بيطلب منهم فرصة عمل وأرسل في الايميل مهارته وكام بحث عملهم في الجامعة عن عملة البيتكوين

وبعد كام مقابلة مع المؤسسين 

تم تعيينه في خدمة العملاء

وكان بيتصرفله الراتب بالبيتكوين

سعر البيتكوين الواحد في الوقت ده كان مقرب من الـ ١٣$ 

بيقول كارسن أنه كان الموظف الوحيد لخدمة العملاء لحد ما وصل عدد عملاء الشركة إلى ٢٥٠ ألف عميل

تم ترقيته إلى رئيس المخاطر

وفي ٢٠١٦ قرر كارسن ترك عمله في شركة كوين باس عشان يبداء العمل الخاص بيه

أسس أول صندوق تحوط للعملات الرقمية من شقة صغيرة باسم بوليسين كابيتال 

في الفترة دي كان سعر البيتكوين وصل إلى ١١٠٠$

وكانت الأصول اللي بيديرها الصندوق ٤مليون دولار

وفي ٢٠١٧ استثمر كارسن في الشركة اللي كان شغال فيها كوين باس واشترى اسهم عندهم

ومع ارتفاع أسعار البيتكوين الجنوني اللي وصل لحد النهارده ٦٠ ألف دولار تقريبا

وصلت الأصول التي بيديرها صندوق بوليسين كابيتال إلى ٣٠٠ مليون دولار

في الفيديو ده كان تجربه لشخصين 

اولاف كارسن هو شخص آمن بمستقبل العملات الرقمية وكانت سبب في تغيير حياته للأفضل.

ولازول هانييتش هو شخص  فرط في ٦٠٠ مليون دولار مقابل قطعتين بيتزا..

نستفاد من تجربتهم ان لما تيجي تاخد قرار في حياتك 

ادرسه كويس وشوف إبعاده بشكل عميق 

عشان ما تجيش بعد فترة من الزمن وتندم علي اللي ضاع منك

بس كده …  اتمنى تكون الحلقة عجبتكم

لو عجبتك الحلقة ما تنساش تدعمنا بلايك وشير

وتشترك في القناة لو لسه مش مشترك

والسلام عليكم ورحمة الله وبركاته.

تقدر تسمع محتوى الحلقة من البدوكاست ده

جوجل بودكاست

ابل بود كاست

سليمان الراجحي قصة نجاح بداءت من تحت الصفر

من الأعمال الدرامية العظيمة اللي هتفضل عالقة في أذهان الناس مسلسل لن اعيش في جلباب ابي قصة عبد الغفور البرعي اللي بدائها من تحت الصفر لحد ما وصل انه بقي من أثرياء مصر

 حاجة كده تجبرك علي احترامها والتعاطف معها وهو بالمناسبة عن قصة حقيقية لرجل من طنطا اسمه نادي السباعي

بطل قصتنا النهارده بينه وبين عبد الغفور البرعي تشابه كبير جدا 

سليمان بن عبد العزيز الراجحي مؤسس مصرف الراجحي اللي بيعتبروه السعوديين من افضل وانجح رجال الاعمال ويمثل مصدر الهام كبير لجميع الشباب في العالم لكفاحه العظيم وإصراره على النجاح رغم الصعوبات

بسم الله والصلاة والسلام على رسول الله

من كام يوم انتشر مقطع على تويتر للشيخ سليمان الراجحي وهو يتبرع ب ١٠ مليون ريال سعودي للعاملين في احدى شركاته دواجن الوطنية

وده اللي خلانا نبحث في سيرة هذا الرجل الجميلة.

ولد الشيخ سليمان الراجحي في البكيرية محافظة القصيم في ٣٠ نوفمبر ١٩٢٨

لأسرة فقيرة وكان ثالث اخوته الاربعة

في عام ١٩٣٧ انتقل مع والده للرياض للحصول على عمل أفضل 

التحق بالمدرسة لكنه تركها في الصف الثاني الابتدائي من اجل حبه في العمل

انطلق الراجحي في بدايته شبه معدومة لم يكن لديه سوى عزيمة قوية في طلب الرزق وجرأة المحاولة والتعلم والاستفادة من تجارب الاخرين

في سن الـ12 بدأ سليمان الراجحي جمع البلح لأصحاب مزارع النخيل، الذين كانوا يدفعون له ستة ريالات شهرياً

كان شغوفا بالعمل منذ بدايته وشديد الملاحظة والنشاط

بدأ في تقليد التجار في الرياض وبدأ في بيع الكيروسين وكان يستخدم في الاضاءة قبل ظهور الكهرباء والبترول.

وباع الحليب وعمل حمالا وحارسا للبضائع و كناسا وطباخ وقهوجي

في سن الـ ١٥ كان بيحوش القرش علي القرش زي ما قال في أحد اللقاءات الصحفية حتى يتمكن من إنشاء دكانه.

يقول الراجحي «لم أكن أفطر، كنت حمّالاً لأغراض الناس، كنت بستنى الثوب الوحيد بعد غسله حتى يجف لألبسه». 

وكانك بتتكلم عن عبد الغفور البرعي في مسلسل لن اعيش في جلباب أبي

وفي عام ١٩٤٣فتح دكان صغير لبيع السكر والشاي والكبريت والحلوى 

وبما انه رائد اعمال كان ينفرد ببيع سلع في دكانه الصغير لم تكن تباع في ذلك الوقت الا في البحرين.

وفي عام ١٩٤٥ باع دكانه بمبلغ١٥٠٠ ريال هو مبلغ كبير في ذلك الوقت لتسديد تكاليف زواجه

يقول الراجحي وُفقت بالزواج من أربع نساء ساعدوني في حملي الكبير.

واخد بالك انت النجاح بيجي منين 

وفي نفس العام انتقل سليمان الى مدينة جدة للعمل مع شقيقه الأكبر صالح ليكون مسؤولاً عن النشاط التجاري الخاص بالصرافة في جدة ومكة كان يعمل في الصرافة خلف صندوق خشبي أخضر مازال يحتفظ به حتى الآن. 

وقد اجتهد وقد كان يحمل الطرود والأمانات ويوصلها وهي على ظهره إلى المطار قاطعاً ما يزيد على العشرة كيلومترات ليوفر أجرة الحمال والنقل. 

كما تاجر في الأقفال والأقمشة ومواد البناء وغيرها، وعندما بدأت الأعمال في النمو ولوحظ تحقق أرباح مشجعة قام الشيخ سليمان باستئجار دكان صغير تحت مسجد عكاشة في جدة.

 وبعد أحد عشر عاماً من العمل مع شقيقه صالح، اتفق الاثنان على تحويل ذلك الدكان ليكون شراكة بينهما وأصبح ذلك أول عمل رسمي له وذلك في عام ١٩٥٧ويعتبر هذا العام هو البذرة الحقيقية لمصرف الراجحي

اشتهر الراجحي بـ امانته وحبه للعمل وصدقه مع الناس

وعام ١٩٧٠ كانت نقلة جوهرية في حياته 

قام بافتتاح شركته الخاصة لتبادل العملات بعد أن انفصل عن أخيه 

وبدأت اعماله تنجح وتتوسع عام بعد عام وحقق نجاحا كبير

وفي ٢٣ يناير  ١٩٧٨ أسس سليمان الراجحي مصرف الراجحي رسميا برأس مال ١٥ مليار ريال سعودي

وفي وقت قليل توسع وانتشرت فروعه داخل المملكة

مصرف الراجحي الان يعتبر واحد من اشهر المصارف في العالم

عندهم شبكة واسعة جدا تضم أكثر من ٥٧٠ فرعًا ، وأكثر من ١٤٢ فرعًا مخصصًا للسيدات ، وأكثر من ٥٫١٩٠ جهاز صراف آلي ، واكثر ١٠٦الف  جهاز لنقاط البيع مثبتة مع التجار اللي هي زي ماكينات فوري في مصر ، و٢٣٢ مركز للحوالات المالية و أكبر قاعدة عملاء في المملكة..

يعد مصرف الراجحي واحد من اقوى المراكز المالية في العالم 

إذ يدير أصولا بقيمة ١٠٢ مليار دولار ويبلغ رأسماله ٧ مليار دولار 

ويعمل فيه ٩٦٠٠ موظف 

مصرف الراجحي ليس هو النشاط الوحيد للشيخ سليمان إذ يمتلك الكثير من الشركات الكبرى في المملكة وخارجها زي مثلا

• الوطنية للدواجن وتعتبر أكبر شركة لإنتاج الدواجن في الشرق الاوسط

• الوطنية للبلاستيك والورق

• الوطنية للصناعة والنقل

• الوطنية الزراعية

• أملاك العقارية

• اسمنت ينبع

• سلسلة مطاعم داجن

فضلا عن امتلاكه عدد كبير من الأسهم في شركات الاستثمار وأصول اخرى تتخطى قيمتها المليار دولار.

اعتبرته مجلة فوربس ثالث أغنى رجل في العالم العربي

حصل على جائزة الملك فيصل العالمية فرع خدمة الإسلام في عام ٢٠١٢

وجائزة رجال الأعمال المتميزين 

ووسام الملك عبدالعزيز عام ١٩٩٩

 

وفي عام ٢٠١٥ احتل المرتبة السادسة ضمن قائمة تضم ٢٠ شخصا من أكثر الاشخاص كرما حول العالم حسب مجلة بيزنس إنسايدر لكثرة أعماله الخيرية

حيث اهتم بالعمل الخيري بشكل كبير

اذ قام الشيخ بكتابة وصيته وتبرع فيها بثلث تركته وقف لله تعالي 

و اصدار كتاب خاص لوصيته (الشيخ سليمان الراجحي قصته مع الأوقاف)

إنشاء جهة خاصة لتنفيذ أعماله الخيرية تحت اسم مؤسسة سليمان بن عبدالعزيز الراجحي الخيرية

إنشاء جامعة سليمان الراجحي بالبكيرية وهي مؤسسة غير ربحية وتكون بالمجان لغير القادرين 

ومع ذلك حافظ علي تواضعه وحبه للعمل فكان يتابع اعماله بحب وشغف وكان يتمنى لو ان يكون الاسبوع ٩ ايام

ومن شدة تواضعه كان لديه ثوب ابيض عمره ٣٠عام كان يلبسه حتى لا ينسى نعمة الله عليه

قصة نجاح مطاعم البيك ـ من الافلاس الي العالمية

مطاعم البيك واحد من أشهر المطاعم في المنطقة العربية

ليهم اكتر من ٩٠ فرع في السعودية وخارجها

ما ينفعش تكون في السعودية وما تروحش عندهم

ايه قصتهم وايه سبب نجاحهم ده اللي هنعرفه مع بعض في حلقة النهارده

بسرعة بقى كوباية الشاي بتاعتك وركز معايا

في السبعينات كانت السعودية بتعيش طفرة كبيرة حالة تطور عام تجتاح البلاد

فكان معظم الناس بيقضوا طول اليوم خارج البيت في الشغل.

ومع احتياجهم لوجبات في الشغل كانت معظم المطاعم تقليدية وعفا عليها الزمن

وهنا بيجي دور رائد الأعمال الذكي.

شاف الشاب الفلسطيني شكور أبو غزالة المقيم في جده في ذلك الوقت فرصة عظيمة انه ممكن يعمل مطعم يقدم الوجبات السريعة بجودة عالية وسعر مقبول وقرر يختار الدجاج المقلي لاول مرة في السعودية وجاب توكيل من شركة كبيرة لاستخدام خلطتهم واسمهم

وفي عام ١٩٧٤ انطلق مطعم شكور أبو غزالة تحت اسم البروست

استثمر شكور أبو غزالة كل ما يملك في هذا المطعم وكان الاقبال عليه ضعيف جدا لأن الفكرة جديدة على المجتمع...

 وده طبعا حال أي مشروع جديد..

يقال انه باع ١٠٠ وجبة خلال عام كامل ولكنه لم ييأس..

ولما بدأت أعماله تكبر والشغل يزيد ويعدي المرحلة الصعبة في أي مشروع وهي البداية..

في عام ١٩٧٦ داهمه السرطان وقعد في البيت حتى مات رحمه الله..

بيقول ابنه الاكبر احسان اللي كان متخرج جديد من هندسة البترول والمعادن

تعلمنا من والدنا كل شئ وكان إصراره ومثابرته على العمل الشاق مصدر إلهام ودافع لنا..

بعد موت الأب وجد الابن نفسه أمام قرار هام..

إما أن يصفي جميع اعمال والده و يبحث عن وظيفة كبيرة بشهادة الهندسة..

واما ان يكمل حلم والده لو انت مكانه هتعمل ايه؟

قرر احسان ابو غزالة اكمال حلم والده..

لما استلم احسان إدارة الشغل لاقى فوضى كبيرة ولاقى ان وكالة الشركة الفرنسية اتلغت بسبب موت الطرف التاني..

اخد قرار جرئ جدا وقام بتصفية جميع اعمال والده وساب المطعم بس..

في الفترة دي كانت المنافسة صعبة جدا. 

ووصل عدد المطاعم اللي بتقدم الوجبات السريعة في جده اكتر من ٤٠٠ مطعم..

معظمهم كان بيقلد فكرة والدهم ويقدموا الدجاج المقلي (البروست)

بعد فترة من استلامه الشغل جاتله رسالة من البنك تطالبه بدفع ديون بالملايين او الحجز على كل ممتلكاتهم..

يقول رامي ابو غزالة بعد ان تخرجت من الجامعة كان عندنا حافز لاكمال حلم والدنا..

وقعنا على كمبيالات  لتسديد ديون البنك على سنتين..

استخدمنا كل أساليب التقشف..

لغينا الشاي والقهوة من المكتب كنا نجلس في مكاتب صغيرة

كنا بنعمل كل حاجة بنفسنا عشان نوفر من نظافة وغسيل وطبخ وغيره..

كانت ايام صعبة..

اتعلمنا من التجربة دي اننا نحافظ علي فلوسنا وحلالنا..

واتعلمنا كمان اهم درس ممنوع الاقتراب من قروض البنوك نهائيا..

بيقول رامي:

قررنا نعرف كل حاجة عن مجالنا وطريقة ادارته بشكل سليم..

وعشان كده سافر احسان لفرنسا لدراسة علم تكنولوجيا الادارة..

عشان نقدر نكون مستقلين ونتخلص من الوكالة اللي كنا بنشتري منهم الخلطة السرية بسعر غالي جدا..

نجح المهندسين الشبان في اعادة تصميم نشاط والدهم من الألف إلى الياء..

بيقول رامي:

بدأنا في تطبيق الأنظمة اللي تضمن الجودة والكفاءة..

وصفة البيك السريه:

في سنة ١٩٨٤ لما رجع احسان من فرنسا اشتغل هو وأخوه علي تطوير خلطة للتوابل مكونة من ١٨ عنصر..

بيقول رامي:

اشتغلنا على الخلطة وجربناها على الزباين من غير ما يعرفوا ..

المرحلة دي اخدت من ٣ الي ٤ سنين..

بيقول كنا كل يوم نحضر المواد الأولية ونشحنها على مكان سري محدش يعرف عنه حاجة..

في المرحلة دي كان لازم نعمل كل حاجة بنفسنا..

اسم مطعم البيك:

بعد انتشار المطاعم في جده كلها تحمل اسم البروست..

تم الاساءة بشكل كبير للاسم ده بسبب عدم جودة ونظافة المطاعم الاخرى..

ومع تطوير مطعمهم وتحسن التعبئة وتطوير العمليات ونظام الإنتاج وتدريب العاملين..

قرروا انهم لازم يميزوا نفسهم بعلامة تجارية جديدة وشعار جديد..

وفي سنة ١٩٨٦ اتفقوا على اسم (مطاعم البيك)

وهو مأخوذ من المصطلح العثماني (الباشا)

بيقول كومو برافاتي مدير العمليات في الفترة دي:

العملاء بدأوا في التدفق على فروع المطعم الذي يحمل علامة تجارية جديدة..

واصبح البيك رمزا معروف ومطعم مميز يقدم خدمة مختلفة بأعلى معايير الجودة والسرعة والنظافة..

التوسع:

كان النجاح الكبير اللي حققه المطعم في جده اثر كبير على تنشيط خطة التوسع..

فكان أول توسع ليهم خارج جده في مكة المكرمة واللي بتبعد ساعة واحدة عن جدة في عام ١٩٩٠..

وهنا كان الانفجار العظيم انتشر البيك في كل مكان في المملكة العربية السعودية

مشاهد الزحام أمام فروع البيك بقى دافع كبير لهم من نجاح لنجاح ومن توسع لتوسع..

أصبحت مطاعم البيك رمزا من رموز السعوديه

 ما ينفعش بأي حال تزور السعودية وما تروحش عند البيك

اسباب نجاح مطاعم البيك:

بيقول رامي ان الشركة بتعتمد علي اربع اعمدة رئيسية 

لو اختل واحد منهم اختل توازن الشركة كلها..

1. الناس : الزباين والعاملين قبل ما تاخد اي قرار لازم تحط في اعتبارك ايه الفايده اللي هيخدها الزبون والعامل..

2. الجودة: جودة الأكل وجودة الخدمة لها اولوية كبيرة..

3. الربح طويل المدى: لا تفكر في الربح القصير لان كل حاجة بتيجي بسرعة بتروح بسرعة، احنا فضلنا ٢٥ سنة نبيع الوجبة بسعر ١٠ ريال كان ممكن نزود السعر ولكن التزامنا بالربح طويل المدى..

4. التفاعل مع المجتمع: بيقول رامي ابو غزالة ان اي شركة او فرد يقدر يعيش في مجتمع ياخد منه ولايعطيه فده عنوانه الفشل.

في اعتقادي ان السبب الأكبر لنجاح مطاعم البيك وشهرتها الكبيرة 

لما استلم احسان ابو غزالة المطعم بعد وفاة والده..

لقى من الديون المطلوب سددها دين لجمعية خيرة كان والدهم بيدفع لهم ريال من كل وجبة صدقة ..

وبعد موت شكور أبو غزالة رحمة الله عليه مفيش فلوس وصلت لهم ..

فسالت الجمعية عن مصير الفلوس دي..

اتفاجئ أولاده وقرروا انهم هيدفعوا ٢ ريال لكل وجبة أكرما لوالدهم ولسه بيدفعوها لحد النهارده.

شجرة الخير يا جماعة.. شجرة الخير لا يمكن تموت.

قالو في الامثال المركب اللي فيها لله ما بتغرقش ..

كان ممكن في اوقات كتير مرت عليهم يقفلوا المطعم وكل واحد يشق طريقه..

لكن ارادة ربنا ان مطعم البيك ينجح ويكمل و يبقى واحد من أشهر المطاعم في المنطقة العربية عشان ريال صدقة كان بيدفعوا شكور أبو غزالة رحمة الله عليه..

سبحان الله وده مصداقا لحديث النبي محمد صلى الله عليه وسلم

ما نقص مال من صدقة بل يزده.. بل يزده.. بل يزده

تقدر تسمع محتوى الحلقة علي جوجل بودكاست

هنا